Resep kacida mun ningali barudak leket ibadah teh, utamana dialajar shalat nu lima waktu. Sanajan sakapeung mah sok dicampuran ku bari ocon heureuy. Enya da geus umumna barudak rek dimana-dimana ge kitu kabiasaannana. Tong boroning dina kaulinan, najan keur dialajar shalat ge sok bari heureuy jeung guyon.
Saperti di lembur kuring, lima urang budak ku guru ngajina dititah diajar shalat berjamaah. Salah saurang diantarana dititah jadi imam, nu lianna ngama'mum ditukangeunana. Nya kitu geuning ari nu ngaran barudak mah, dialajarna teh bari silih sered, silih siku, silih dupak, jeung sajabana ti kitu. Komo deui mun teu ditalingakeun, cacak-cacak ditungguan ku guruna tur dipapatahan, ehhh tetep we dicampuran ku bari hareureuy bae.
Sabot keur ruku, si Kirdun nu jadi imam kopeahna murag. Tuluy ku si Kirdun kopeah teh dicokot heula, rap dipakekeun deui. Atuh puguh we ningali kalakuan kitu nu jadi imamna teh, ma'mum nu aya di tukangeunnana ting cilikitik nahan piseurian. Malah aya oge anu nepi ka seuri, sanajan dipengpekan ku ramona. Ceuk ma'mun nu saurang ngomong lalaunan ka baturna nu seuri: "Hah ... siah, maneh seuseurian, batal shalatna !" kitu cenah pokna.
Ari budak anu seuri tea kalahka nempas: "Ehhhh ... maneh teh tong ngomong ari keur shalat, batal eta oge!" kitu tembalna.
Gigireun budak nu keur silih tempas malah nambahan ngilu nembal: "Heueuh ...silaing baratal shalatna oge da bari ngararomong, dewek we nu titadi teu ngomong-ngomong mah...!" kitu pokna bari jonjong nuturkeun imam nu geus sujud.
Budak nu jadi ma'mum ka opat pang tuntungna, manehna mah kalah pindah tempat katukangeun nu tiluan. "Ahh ... dewek sieun kaganggu, embung ngomong aing mah !" pokna teh bari terus nurutan imam nu rek sujud kadua kalina.
Keur guntreng kitu, nu jadi imam rek sujud di hareup sukuna dicoco reungit, tuluy digaruk-garuk ku leungeun katuhuna. Waktu keur gagaro, suku imam teu ngahaja ngajejek sirah ma'mum nu aya ditukangeunana. Rada tarik oge kajejekna teh, da eta we nepi ka reuwaseun. Abong-abong budak, samaruk ari ngama'mum teh kudu silih jejek, atuh nu aya ditukangeun manehna teh dijejek deui.
Budak nu pangtukangna dijejek teh, ngalieuk ka tukang, euweuh sasaha. Teu tata pasini deui, jung nangtung, gidig ka hareup ngadeukeutan imam, bari pokna: "Kirdun aing teu kabagean ngajejek, ku dewek sirah maneh tah dijejek deui ... lunas nya?!" cenah, bari kituna teh berebet lumpat balik da sieun dibales.
(Carita ieu ngan ukur fiktif, diropea ku Kie Herman)
Tidak ada komentar:
Posting Komentar