R A D I O 

      

       Baheula mah keur can rame televisi, nu ngaran radio transistor teh jadi implengan jelema jegud. Arang langka atuh da nu bisa kabeuli radio teh. Paling ti sahiji lembur mah ukur saurang dua urang nu bogaeun teh. Teu saeutik oge nu bisa meuli teh nepi ka ngajual kebon, ingon-ingon: sapi, domba, atawa munding. Kadangkala bakat ku hayang ku nu ngarana radio transistor kajeun teuing imah ge dijual.

       Kabejakeun si Aki geus ngajam mun panen rek ngajual kabeh parena, rek meuli radio transistor. Nepi ka tatanya sagala ka tatanggana kana hargana. Bakat ku sieun teu mahi ku duit ladang ngajual pare ditambahan deui ku ngajual sapi sagala.

       Nepi ka kota Bandung "The Parish van Java" cenah zaman Walanda mah, si Aki teu mangkuk tatanya langsung ka toko elektronik tuduhan ti tatanggana tea. Si engko Oo nu boga toko langsung nanya ka si Aki "Peryogi naon aki teh ?" cenah pokna darehdeh.

"Rek meuli radio transistor, Ko !" jawab si Aki tandes.

"Mangga atuh Ki, bade nu ieu... atawa nu mana? Tah ieu nu paling sae mah !" kitu ceuk engko Oo nyodorkeun radiona.

"Ahhh.. pokona mah hayang radio transistor saya mah !" tempas si Aki deui.

"Muhun, tah ieu !" Ko Oo deui. Kulantaran si Akie can nyaho nu disebut radio transistor, si Aki pok ngomong "Bener ieu teh radio transistor?" tanyana bari rada legeg.

"Leres, Ki !" tembal si engko Oo ngayakinkeun. Teu loba catur deui, dibayar we ku si Aki radio teh.

       Kocapkeun geus nepi ka lembur, si Aki gagancangan asup ka imah. Bari teu ganti heula pakean langsung we nyetel radio, diputer-puter gelombangna. Pas nepi kana hiji gelombang kakara rek der siaran langsung Wayang Golek. Harita mah nu kasohor dalangna teh Dede Amung Sunarya. Tapi biasana satiap rek ngamimitian penyiar radio pok ngomong kieu "Inilah Stasiun Radio Republik Indonesia Bandung ... !" kakara pok kitu, langsung radio di pareuman. Si Aki nafsuna bea karep, pajarkeun teh si Engko nu ngajual radio teh nipu. 

       Nepi deui ka toko, gantawang si Akie nyarekan ka si Engko Oo "Ko... aing teh matak meuli kadieu ge hayang radio transistor, lain Radio Republik Indonesia !" cenah. Si engko meni ngahuleng bari ngagerentes dina hatena "Aki-aki edaaaaaannnn teu kira-kira !"